Gwnaeth digwyddiadau yn y gynhadledd ryngwladol yn Davos ym mis Ionawr 2026 yn glir iawn na ellir gohirio mater ailymuno'r DU â'r Farchnad Sengl Ewropeaidd a'r Undeb Tollau mwyach. Rhaid ystyried ymrwymiad pendant tuag at ailymuno â'r UE fel mater o frys mawr nawr, nid yn unig am resymau gwleidyddol, cymdeithasol a diwylliannol, ond er mwyn cryfhau diogelwch economaidd ac, yn wir, milwrol ymhlith cymdogion o'r un anian.

Mae Cymru wedi bod yn edrych tuag allan erioed. Mae datblygiadau diweddar, fel ail-dderbyn y DU i raglen ymchwil Horizon Europe a thrafodaethau ar symudedd pobl ifanc ac Erasmus+, yn dangos yr hyn y gall ymgysylltu adeiladol ei gyflawni. Dylai'r Senedd nesaf adeiladu ar y momentwm hwn a hyrwyddo partneriaeth gryfach gyda'n cynghreiriaid agosaf.

Argymhellion Allweddol:

• Hyrwyddo heddwch a democratiaeth drwy gydweithredu'n agos â chymdogion Ewropeaidd.
• Cefnogi polisi tramor pragmatig sy'n blaenoriaethu cydweithio â phartneriaid Ewropeaidd.
• Cydnabod y newid ym marn y cyhoedd ers 2016 a gweithredu arno drwy gryfhau cysylltiadau ag Ewrop.
• Amddiffyn aelodaeth barhaus y DU o Gonfensiwn Ewropeaidd ar Hawliau Dynol.

Bron i ddegawd ar ôl y refferendwm, rhaid inni asesu'n onest beth mae Brexit wedi'i olygu i Gymru. Mae barn y cyhoedd wedi newid yn bendant, canfu arolwg Deltapoll ym mis Ionawr 2026 y byddai 65% o bobl yng Nghymru yn pleidleisio i ailymuno â'r UE. Ymhlith pobl 18 – 24 oed ledled Prydain, mae'r ffigur hwnnw'n codi i 86%.

Mae Swyddfa Cyfrifoldeb Cyllidebol y DU yn amcangyfrif gostyngiad hirdymor o 4% mewn CMC o ganlyniad i Brexit. Dylai'r Senedd nesaf bwyso ar Lywodraeth y DU i gomisiynu adolygiad tryloyw o'r canlyniadau, a defnyddio'r dystiolaeth honno i arwain polisi yn y dyfodol.

Argymhellion Allweddol:

• Comisiynu adroddiad annibynnol ar effaith gadael y farchnad sengl, yr undeb tollau, a rhaglenni eraill yr UE.
• Gwerthuso manteision a cholledion gwirioneddol cytundebau masnach newydd ers Brexit.
• Cyhoeddi canfyddiadau a nodi llwybr polisi clir i fynd i'r afael â'r difrod ac ailadeiladu ffyniant.

Rhoddodd aelodaeth o'r UE amddiffyniadau cryf i Gymru mewn meysydd o hawliau gweithwyr i safonau amgylcheddol. Ers gadael, mae'r mesurau diogelwch hynny wedi erydu. Mae Deddf Cyfraith yr UE a Gedwir 2023 mewn perygl o'u gwanhau ymhellach, gan roi pwerau eang i Weinidogion Llywodraeth y DU i newid neu ddileu amddiffyniadau gyda chraffu lleiaf posibl.

Argymhellion Allweddol:

• Gwrthdroi'r erydiad mewn hawliau a safonau ers gadael yr UE.
• Disodli Deddf Cyfraith yr UE a Gedwir gyda gwarant gyfreithiol rwymol i gynnal neu ragori ar safonau blaenorol.
• Cynnal aliniad agos â rheoliadau'r UE ar feddyginiaethau, awyrenneg, cemegau, bwyd, data, a diogelu'r amgylchedd.

Cafodd Cymru ei thynnu o raglenni a sefydliadau Ewropeaidd a oedd yn darparu manteision pendant, o Erasmus+ i Asiantaeth yr Amgylchedd Ewropeaidd. Mae'r unigedd hwn wedi niweidio ein pobl ifanc, ein hymchwilwyr, a'n diwydiannau diwylliannol. Partneriaeth yw'r llwybr i gyfle, arloesedd, a ffyniant a rennir.

Argymhellion Allweddol:

• Ailymuno â rhaglen Erasmus+ ac Ewrop Greadigol.
• Cefnogi Cynllun Symudedd Ieuenctid y DU – yr UE i adfer cyfleoedd i bobl ifanc.
• Cefnogi trefniadau teithio diwylliannol cilyddol ar gyfer cerddorion, perfformwyr a gweithwyr proffesiynol creadigol.
• Ceisio cysylltiadau agosach ag Asiantaeth Meddyginiaethau Ewrop ac Asiantaeth yr Amgylchedd Ewrop.
• Cryfhau cydweithrediad â'r UE ar weithredu yn erbyn yr hinsawdd, diogelwch bwyd, diogelu'r amgylchedd, diwylliant, ymchwil ac amddiffyn.